Raad sê hoof moet pad vat ná bedrog
2011-04-01 09:10
Noordwes – Die ANC-beheerde Dr. Kenneth Kaunda-distriksmunisipaliteit in Noordwes het Donderdag eenparig besluit om sy geskorste munisipale bestuurder af te dank.
Adv. Abbey Dlavane se salaris van R1,1 miljoen per jaar wat hy die afgelope 14 maande tydens sy skorsing en hangende ’n interne ondersoek steeds ontvang het, verval met onmiddellike uitwerking, het Ryk van Jaarsveld, DA-raadslid in die distriksmunisipaliteit, gesê.
Die munisipale woordvoerder het nie Donderdag haar selfoon beantwoord nie.
Dlavane is einde verlede jaar ná die interne ondersoek en ’n tugverhoor skuldig bevind aan bedrog, growwe wangedrag, geldelike onreëlmatighede en dat hy nie die regte prosedures met die verkryging van goedere en dienste gevolg het nie.
Die Valke se kommersiële misdaadondersoekeenheid in Klerksdorp het hom vroeër vandeesmaand op aanklagte van bedrog en korrupsie in hegtenis geneem. Dié aanklagte hou verband met die misdrywe waaraan Dlavane tydens sy tugverhoor skuldig bevind is.
Hy het na bewering verlede jaar, terwyl hy geskors was hangende die tugondersoek teen hom, na sy kantoor gegaan, magtiging vir ’n tjek van R550 000 gekry en dit aan sy eie maatskappy oorbetaal vir dienste wat nooit gelewer is nie.
Die munisipaliteit het daarna die polisie betrek. Intensiewe ondersoekwerk het volgens lt.kol. Lesego Me-tsi, polisiewoordvoerder, tot Dlavane se inhegtenisneming gelei.
Brig. Thulani Ngubane, kommunikasiehoof van die polisie in Noordwes, het vroeër gesê die polisie soek ook na me. Onica Bogatsu, wat ook by die Dr. Kenneth Kaunda-distriksmunisipaliteit werk en skynbaar soos ’n groot speld verdwyn het toe sy hoor die polisie soek na haar.
Sy is egter intussen op aanklagte van bedrog en korrupsie gearresteer en op borgtog vrygelaat.
By gister se raadsvergadering waar die ANC en opposisiepartye saam besluit het Dlavane moet afgedank word, is ook ooreengekom dat Oupa Sebolai, waarnemende munisipale bestuurder, sy volle samewerking aan die polisie en die regering se spesiale ondersoekeenheid sal gee om die saak teen Dlavane – en moontlik ander amptenare se betrokkenheid – te ondersoek.
Die Dr. Kenneth Kaunda-distriksmunisipaliteit sluit die Ventersdorp-, Tlokwe-, Maquassi Hills- en Matlo-sana-munisipaliteite in.
Volg Nuus24 op Twitter