R50 000 per dag vir huise in ANC-feestyd
2011-12-06 08:01
Bloemfontein. – Inwoners van ’n luukse woonbuurt in Bloemfontein kan byna R50 000 per dag verdien as hulle hul huise tydens die ANC se eeufeesviering aan hoëlui van die buiteland verhuur.
Van die inwoners in huise in Woodland Hills Estate wat meer as R3 miljoen werd is, is glo meer as R240 000 aangebied vir die vyf dae wat die staatshoofde hul intrek gaan neem.
Teen gemiddeld sowat R30 000 per dag gaan die 60 mense wie se huise gehuur word saam R10 miljoen of meer verdien wanneer die ANC van 5 tot 9 Januarie volgende jaar feesvier.
Die ANC het Maandag ontken dat belastingbetalers vir die oorsese gaste se verblyf gaan opdok.
William Bulwane, ANC-woordvoerder in die Vrystaat, het bevestig dat 60 huise in die veiligheidsbuurt gehuur is. Die ANC het die huiseienaars self genader.
Volgens ingeligtes gaan ’n bekende hotelgroep elke huis net met hul beddegoed en handdoeke inrig. Die huise sal egter eers ’n veiligheidsklaring moet slaag.
Hoewel die huise vir vyf dae gehuur word, sal die gaste glo net twee nagte daar bly. Die eerste dag sal veiligheidsmaatreëls ingestel word, die tweede dag sal die hotelgroep die huise inrig en op die vyfde dag word die huise skoongemaak. Die gaste sal die derde en vierde nag daar bly.
’n Plaaslike maatskappy gaan die huurkontrakte hanteer.
– Volg Nuus24 op Twitter
- Volksblad