R50 000 borgtog vir Block, medebeskuldigdes
2012-11-21 18:00
Johannesburg – Die Noord-Kaapse ANC-leier John Block en twee ander provinsiale ANC-swaargewigte is op borgtog van R50 000 elk vrygelaat ná hulle Woensdag in die hof verskyn het, het die nasionale vervolgingsgesag (NVG) gesê.
Block, die ANC se Noord-Kaapse voorsitter en LUR vir finansies, ekonomiese ontwikkeling en toerisme, het in die Kimberley-landdroshof verskyn saam met die LUR vir maatskaplike ontwikkeling, Alvin Botes, die ANC-LP Yolanda Botha, drie amptenare van die staatsagentskap vir maatskaplike sekerheid (Sassa) en 'n sakeman.
Phaladi Shuping, nasionale woordvoerder vir die NVG, het gesê die sewe is in hegtenis geneem vir bedrog, korrupsie en geldwassery wat sowat R49 miljoen beloop.
"Block, Botes, Botha en die sakeman Christo Scholtz is elk borgtog van R50 000 toegestaan," het hy gesê.
"Die drie Sassa-amptenare, Rodney Saal, Calvin Rayland en Palesa Lebona, is op R5 000 borgtog vrygelaat. Die saak is tot 7 Maart uitgestel."
Kapt. Paul Ramaloko, woordvoerder vir die Valke, het gesê die sewe is Woensdagoggend by hulle huise in en om Kimberley in hegtenis geneem.
– Volg Nuus24 op Twitter.
- SAPA
