R238m. se maatskaplike toelaes is verduister
2012-03-21 08:02
Kaapstad – Nagenoeg 80% van die amptenare wat die uitbetaling van maatskaplike toelaes moet bestuur, het nie sekerheidsklaring nie.
Dié toelaes, wat die regeringsagentskap vir maatskaplike sekerheid (Sassa) moet uitbetaal, beloop in die boekjaar 2012-’13 meer as R104 miljard.
’n Sekerheidsklaring dui onder meer aan of iemand voorheen in ’n hof skuldig bevind is aan ’n misdaad soos bedrog of korrupsie. Vusi Madonsela, direkteur-generaal in die departement van maatskaplike ontwikkeling, het hom Dinsdag in die parlementêre komitee oor maatskaplike dienste hieroor uitgelaat.
’n Geskrewe antwoord op ’n parlementêre vraag het vandeesweek getoon 24% van dié amptenare se sekerheidsklaring word tans verwerk, maar 57% van die amptenare se prosesse het nog nie eens begin nie.
Mike Waters, DA-LP, het in ’n verklaring gesê tussen 2005 en 2011 het Sassa R238 miljoen deur bedrog en korrupsie verloor.
Dit is die gevalle wat wel opgetel is, want die departement is besig met die herregistrasie van begunstigdes van die toelaes om seker te maak dié wat dit ontvang is inderdaad wie hulle sê hulle is en dat hulle nog lewe.
Volgens Waters is nagenoeg 22 000 sake van bedrog met maatskaplike toelaes tussen 2005 en 2011 aangemeld.
“Dit is van uiterste belang dat die Sassa-administrasie bo verdenking moet wees, en sekerheidsklarings is die enigste manier om dit te verseker.”
Hy het gesê die DA gaan aanbeveel dat dit ’n voorwaarde word vir aanstellings.
Volgens Madonsela is daar talle uitdagings rondom die sekerheidsklarings.
“Die grootste deel van die werknemers by Sassa is oorgeplaas uit die provinsiale departemente en hul agtergrond is nooit nagegaan nie. Dié wat direk deur Sassa aangestel is, se agtergrond is nagegaan.”
Volgens hom het talle regeringsdepartemente dieselfde probleem.
– Volg Nuus24 op Twitter
- Die Burger
