R2.3 milj. se perlemoen gevind
2010-02-02 02:00
Kaapstad – Die polisie in Kaapstad het die afgelope naweek beslag gelê op sowat R2.3 miljoen se perlemoen wat onwettig gestroop is.
Volgens kapt. Frederick van Wyk, woordvoerder vir die Gansbaai-polisie asook die marine- en kusbestuur, het hulle Saterdag omstreeks 19:00 sowat 60 verdagtes vasgetrek wat besig was om onwettig perlemoen te stroop.
“Dié groep het verskeie skote afgevuur en ook petrolbomme en klippe na die polisie gegooi.”
Een van die beweerde stropers is tydens die skietery met die polisie in die arm gewond.
“Niemand is nog in verband met die misdaad in hegtenis geneem nie maar die polisie het beslag gelê op vyf sakke met meer as 1620 perlemoene ter waarde van R400 000.
Dieselfde dag omstreeks 20:45 het die polisie in Vredenburg ‘n 23-jarige man op 'n plaas vasgetrek nadat hy glo sowat R1 miljoen se perlemoen in sy besit gehad het. Dié verdagte sal Dinsdag in Vredenburg in die landdroshof verskyn.
Later Saterdagaand het die polisie ook ‘n bakkie afgetrek tydens roetine patrollie in Napier en beslag gelê op verskeie perlemoen.
“Die polisie het 13 plastieksakke vol perlemoen gevind. Die waarde van die perlemoen word geskat op R900 000,” het Van Wyk gesê.
– Sapa