R220 m. vir top-wonings
2011-12-30 07:41
Johannesburg – Die regering het sedert Mei 2009 meer as R220 miljoen van belastingbetalers se geld bestee om luukse-wonings vir ministers en adjunkministers aan te skaf en op te knap.
Pres. Jacob Zuma het destyds ná sy aanwysing as staatshoof 13 ekstra ministers en adjunkministers aangestel.
In ’n skriftelike antwoord op ’n parlementêre vraag het Thulas Nxesi, minister van openbare werke, gesê die regering het sedert Mei 2009 R115,7 miljoen in Kaapstad en R71,2 miljoen in Pretoria bestee om nuwe huise aan te skaf om die “tekort” aan te vul.
In Kaapstad en Pretoria is onderskeidelik R28,7 miljoen en R5,6 miljoen bestee om kabinetslede se huise op te knap.
R1,2 miljoen is bestee om veiligheid by Hlengiwe Mkhize, adjunkminister van hoër onderwys en opleiding, se woning op te skerp nadat die regering reeds R6,4 miljoen betaal het om die huis te koop. Haar pos het voor 2009 nie bestaan nie.
Nuwe meubels en gordyne vir die huis van Tina Joemat-Pettersson, minister van landbou, bosbou en visserye, het net minder as R700 000 gekos en nog R334 000 is aan opknappingswerk en toebehore bestee.
By die huis van Ben Martins, adjunkminister van openbare werke, is R140 000 aan gordyne en R770 000 aan meubels bestee.
Bantu Holomisa, UDM-leier, het gesê dit was ’n fout om die kabinet te vergroot, want Suid-Afrika kan dit nie bekostig nie.
“Ek glo nie dit was die regte besluit nie.
“Dit kos die staat baie geld. Stel jou voor ons het die R220 miljoen eerder gebruik om meer huise vir die armes te bou.”
Teen ’n geraamde koste van R35 000 per huis kon die regering meer as 6 000 laekoste-huise met dié bedrag gebou het.
Zuma het verlede maand nog vier adjunkministers aangestel.
Waar die land tydens oudpres. Thabo Mbeki se bewind 49 ministers en adjunkministers gehad het, is daar nou 66.
’n Minister verdien sowat R1,9 miljoen per jaar en ’n adjunkminister R1,5 miljoen.
Elkeen kry ook ’n motortoelae van sowat R1 miljoen.
– Volg Nuus24 op Twitter.
- Beeld