R1 m. vir taxi-man oor skade aan pad
2011-09-19 09:03
Pretoria – Limpopo se padagentskap en die hoof van die departement van paaie en vervoer moet 100% van ’n taxibestuurder se skade betaal nadat dié ’n ongeluk op ’n beskadigde brug oor ’n rivier gemaak het.
Mbulaheni James Mudau van Thohoyandou in Limpopo eis R990 000 van dié owerhede (die verweerders).
Die hooggeregshof in Pretoria het bevind die verweerders is aanspreeklik vir 100% van die skade wat Mudau kan bewys.
Die hofgeding om die omvang van die skade vas te stel, is onbepaald uitgestel.
Die departement van paaie en vervoer is die enigste aandeelhouer in die padagentskap, ’n statutêre maatskappy.
Mudau sê in sy hofstukke hy was op 20 November 2008 in ’n ongeluk op die pad tussen Thohoyandou en Louis Trichardt betrokke.
Hy sê die verweerders het nie die “struktureel beskadigde brug” oor die Lutanandwarivier herstel nie.
Volgens hom moes die owerhede van dié skade geweet het.
Mudau sê ’n deel van die brug het weens die owerhede se nalatigheid ingeval. Daarom het hy ’n ongeluk gemaak.
Mudau beweer hy het ’n fraktuur in sy rug, ’n ligte kopbesering en kneus- en skaafplekke oor sy borskas heen opgedoen.
– Volg Nuus24 op Twitter
- Beeld