Publiek sal nooit Semenya-uitslae sien
2009-11-01 09:21
Erna van Wyk
Johannesburg - Die uitslag van die geslagstoetse op Caster Semenya deur die Internasionale Vereniging van Atletiek-federasies (IAAF) en die toetse in Suid-Afrika sal nié openbaar gemaak word nie.
Dít was die duidelike boodskap van die ANC se Semenya-taakspan.
“Niemand moet verwag om die uitslae te sien of dat dit bekend gemaak sal word nie. Dit is ’n vertroulike mediese aangeleentheid,” het mnr. Jackson Mthembu, ANC-woordvoerder, gesê.
Die IAAF vergader op 20 en 21 November en volgens berigte sal die geslagbepalingstoetse wat die IAAF tydens die Wêreld-atletiekbyeenkoms in Berlyn op Semenya uitgevoer het, hier bespreek word.
Mthembu het Donderdag herhaaldelik gesê dat die ANC ook daarop aandring dat “alle toetse” wat op Semenya gedoen is “ongeldig” verklaar word.
“Ons is daarvan oortuig dat die uitslae ten gunste van Caster sal wees. Sy is gereed om volgende jaar aan die Statebondspele deel te neem en ook in 2012 aan die Olimpiese Spele in Londen,” het Mthembu op ’n perskonferensie gesê.
Die ANC-taakspan het ook uitgevaar teenoor mnr. Leonard Chuene, president van Atletiek Suid-Afrika (ASA), die ASA-raad en die IAAF.
Die taakspan het sy ondersoek oor die manier waarop die Semenya-debakel hanteer is aan mnr. Makhenkesi Stofile, minister van sport, oorhandig om ’n “meganisme” in werking te stel wat die “waarheid uit ASA moet trek” oor dié sportliggaam se rol.
Mthembu het gesê hulle het vir pres. Jacob Zuma, Semenya en Suid-Afrikaners gelieg. “ASA moet om verskoning vra. Dit is net menslik dat mens nou nie meer enigiets glo wat hulle sê nie. Ons neem alles met ’n knippie sout.”
Chuene het onlangs sy deuntjie weer verander en ontken dat hy gejok het oor sy kennis van die geslagstoetse op Semenya.
Me. Winnie Madikizela-Mandela, wat deel van die taakspan is, sê die feit dat Chuene en ASA geweet het van die geslagstoetse en daaroor gelieg het, is “afgryslik” en dat dié liggaam onbeskaamd lieg.
Die ANC se Semenya-taakspan het bevind:
- Mnr. Leonard Chuene, ASA en die spandokter móét verantwoording doen.
- ASA was “baie verdedigend” en nie “eerlik” toe hulle ondervra is nie.
- Daar was ’n gesamentlike ooreenkoms tussen ASA en die IAAF om toetse op Semenya uit te voer.
- Rapport