Pta was teiken van terreur
2011-06-18 07:26
Pretoria – Die Amerikaanse ambassade in Pretoria het in 2008 ’n dreigement van ’n Al-Kaïda-splintergroep ondersoek oor ’n beweerde beplande aanval met ’n springstofbelaaide vliegtuig op dié ambassade se gebou.
’n Vlieënier, genaamd Assan Shuaib Munir, sou na bewering die aanval uitgevoer het in direkte opdrag van Ayman al-Zawahiri.
Laasgenoemde was destyds een van Al-Kaïda se senior leiers en het pas ná die dood van Osama bin Laden die leierskap van die organisasie oorgeneem.
Die beweerde dreigement is vervat in ’n “veldverslag” wat deel is van dokumente wat Wikileaks nog nie openbaar gemaak het nie.
Dié dreigement is gedoen sowat ’n jaar voordat die Amerikaanse ambassade en verskeie ander Amerikaanse regeringsgeboue in Suid-Afrika drie dae lank weens nog ’n dreigement gesluit is.
Laasgenoemde dreigement is sover bekend deur Al-Shabaab, ’n Somaliese terreurgroep met bande met Al-Kaïda, gedoen.
Die dreigement in 2008 om met die vliegtuig teen die ambassade vas te vlieg, is egter verbind met ’n groep wat vanuit Marokko werk, genaamd Al-Qaeda in the Lands of the Islamic Maghreb (AQIM).
Luidens die veldverslag sou die beweerde aanval vroeg in November 2008 omstreeks 09:45 uitgevoer word.
Geen verdere inligting oor die plan of die soort vliegtuig wat gebruik sou word, kon gevind word nie, lui die verslag.
’n Databasis met besonderhede oor terreurverdagtes het geen besonderhede omtrent Munir bevat nie.
Die operateur wat die verslag saamgestel het, noem egter ook dat geen ander intelligensieverslae die beweerde aanval kon bevestig nie.
Hy noem dat AQIM nog nooit voorheen aanvalle in Suid-Afrika gedoen het nie én dit was te betwyfel of Al-Kaïda se senior leierskap ’n aanval in Suid-Afrika sou goedkeur.
“Hoewel Al-Kaïda-operateurs wel in Suid-Afrika aktief is, is die netwerk gewoonlik beperk tot die fasilitering van aanvalle in Europa,” lui die verslag.
Hoewel die egtheid van die dreigement dus betwyfel is, kon dit nie heeltemal geïgnoreer word nie – veral nie gesien in die kwesbaarheid van die ambassade-gebou nie, lui die verslag.
Elizabeth Kennedy Trudeau, woordvoerder vir die ambassade, het in reaksie gesê die Amerikaanse departement van buitelandse sake lewer as ’n reël nie kommentaar op dokumente wat uitgelek is nie.
Verslae uit die veld deel normaalweg inligting met Washington en Washington tree dienooreenkomstig op met opdragte.
“Verslae uit die veld is dikwels rou (ongetoetste) inligting. Dit is voorlopige inligting en dikwels onvolledig. Dit het ook nie noodwendig ’n uitwerking op beleidsbesluite nie. Dit is ook gewoonlik openhartig en behoort nie uit konteks geneem te word nie,” het sy gesê.
Luidens die terreurdatabasis van die Anti-Defamation League (ADL), ’n internasionale organisasie wat hom vir reg en geregtigheid beywer (www.adl.org), funksioneer AQIM hoofsaaklik in Algerië, Mali, Mauritanië, Niger, Tsjad, Senegal en Nigerië.
Die organisasie het in die verlede verskeie Westerlinge in Algerië ontvoer, asook bomme in dié land geplant. AQIM het egter ook heelparty van sy opgeleide operateurs na Irak “uitgevoer” om dáár selfmoordaanvalle op Westerlinge en Westerse ondernemings te doen.
Een van dié aanvalle was op ’n bus vol werknemers van die Amerikaanse konstruksiemaatskappy Halliburton op 10 Desember 2006 waarin vier Britte en ’n Amerikaner dood is.
Volg Nuus24 op Twitter.
- Volksblad