Pta-‘kindermoordenaar’ ontken skuld
2010-10-05 05:17
Pretoria - ‘n Man wat daarvan aangekla word dat hy twee jong meisies ontvoer, verkrag en vermoor het, het Maandag onskuldig gepleit in die hooggeregshof in Pretoria.
Brian Mangwale (29) het beken hy ken een van sy beweerde slagoffers, die 10-jarige Masego Kgomo. Hy het egter aan die hof gesê hy dra “geen kennis van die misdade nie”.
Hy het onskuldig gepleit op aanklagte van die ontvoerding, verkragting en moord op die vyfjarige Sara Zitha in Soshanguve op 1 April 2006, en van die ontvoerding, verkragting en moord op die 10-jarige Kgomo in Soshanguve op 31 Desember 2009.
Kgomo se ma Kate en ander inwoners van Soshanguve het die vlugtige verhoor bygewoon. Hulle het T-hemde met Masego se gesig en die slagspreuk “Jy het ‘n kind seergemaak, jy het ‘n nasie seergemaak,” op gedra.
Die staat beweer Mangwale het Sara Zitha ontvoer. Sy het vermis geraak terwyl sy by haar tante in Soshanguve gekuier het. Hy het haar na bewering na ‘n rivier in Blok SS in Soshanguve gevat, waar hy haar verkrag en vermoor het en van haar liggaamsdele uitgesny het om vir gebruik in tradisionele medisyne verkoop te word.
Haar ontbindende lyk is twee maande later in die veld naby die rivier gevind.
Op 31 Maart verlede jaar het Mangwale na bewering vir Masego en haar maats gevra of iemand nie vir hom ‘n koeldrank sal gaan koop nie.
Masego het ingestem en hy het vir haar geld gegee toe sy terugkeer. Hy het haar na bewering gevolg toe sy saam met ‘n maatjie by ‘n winkel in is om kos te koop.
Daar het hy na bewering die jong meisie se maatjie geld gegee en haar weggestuur om lugtyd te koop. Hy het toe na bewering vir Masego verkrag en vermoor en weer sekere liggaamsdele uitgesny om as muti te verkoop.
Luidens die klagstaat het Mangwale agt dae later Masego se lyk in die bosse in die veld uitgewys.
Regter Bert Bam het Mangwale se verhoor tot 11 April volgende jaar uitgestel. Hy bly in aanhouding.
- Volg Nuus24 op Twitter
- SAPA