Pta-gesin in huis oorval
2011-12-12 08:30
Pretoria – ’n Man van Pretoria is moontlik verlam en sy ma het breinskade nadat huisrowers hulle Saterdagaand in Pretoria oorval het.
Ruaan Coetzee (21) van Wonderboom is ses keer geskiet, onder meer in sy lyf, been en albei arms. Hy word sedert die aanval onder verdowing gehou.
Sy ma, Linda Coetzee (43), het haar regteroog verloor nadat drie skote haar getref het – in die kop en albei arms.
Haar man, Kobus (46), is drie keer geskiet en die grootste skade is aan sy maag aangerig. Hulle word in verskillende hospitale in die stad behandel.
Rozanne Oeschger (20), Coetzee jr. se vriendin, is skrams in die bobeen getref en is kort ná die aanval uit die hospitaal ontslaan.
Die Coetzee-egpaar het sowat drie weke gelede in dié huis ingetrek – reg oorkant die huis waarin George Savvides (63) in Maart deur sy slaapkamerdeur doodgeskiet is.
Lt.kol. Tshisikhawe Ndou, polisiewoordvoerder, het gesê vier gewapende mans het oor ’n muur van die Coetzees se huis in Dirk van Deventer-rylaan gespring en deur ’n oop deur by die huis ingegaan.
Die Coetzees, wat gister op vakansie sou vertrek, is almal in die gang geskiet.
“Die mans het die familie met vuurwapens aangehou, verskeie kere op hulle geskiet en hulle met toue vasgebind,” het Ndou gesê.
Mnr. Johan Peens en sy vrou, Juanita, die Coetzees se bure, het omstreeks 20:00 gelê en televisie kyk toe hulle ’n harde klop aan hul venster hoor.
“Die meisie (Oeschger) het geskree: ‘Julle moet help! Julle moet help!’ ” het mnr. Peens gesê. “Sy het ingekom, binne ’n minuut vyf oproepe gemaak en vir almal geskree: ‘Ons is geskiet; julle moet kom!’ ”
Oeschger het teruggehardloop na die Coetzees se huis, terwyl mnr. Peens die polisie en die ambulans gebel het. Netcare911 was binne minute op die toneel en het die gewondes behandel en hospitaal toe geneem.
Volgens me. Peens is daar vir haar vertel dat almal in hul kamer was toe die aanvallers by die huis ingekom het.
“Die mans het die tannie gekry en haar vir die kluis se sleutel gevra. Hulle het haar geklap. Sy het probeer teëstribbel, toe word sy geskiet,” het me. Peens gesê.
“Die oom is daarna geskiet.
“Die seun en sy meisie het op hulle afgekom. Soos wat hulle weggehardloop het, het die mans op hulle geskiet.
“Die meisie het toe oor ons muur gespring en kom hulp vra.
“Haar bene was vol bloed.”
Toe die Coetzees se ander seun, Dewald Coetzee, net ná 20:00 by die huis stilhou, het die aanvallers glo weggejaag.
Ndou het gesê die mans het vermoedelik in ’n swart Kia Picanto gevlug. In dié stadium word slegs selfone vermis, het Ndou gesê.
– Volg Nuus24 op Twitter
- Beeld