Psigiatriese pasiënt spring na dood
2009-10-12 08:00
Marelize Potgieter
Kaapstad - ’n Jong man wat vir waarneming in die psigiatriese afdeling van die Karl Bremer-hospitaal in Bellville was, het Saterdag – op Internasionale Geestesgesondheidsdag – selfmoord gepleeg deur van die dak van die hospitaal na sy dood te spring.
Efraim Khabolisa (21) van Khayelitsha het omstreeks 14:00 ses verdiepings ver geval nadat hy ure lank op die dak gestaan het en gedreig het om af te spring.
Volgens Mark van der Heever, woordvoerder van die provinsiale gesondheidsdepartement, is die oorledene die vorige dag in die hospitaal opgeneem.
Hy was onder 72 uur-waarneming en is nog nie gediagnoseer nie.
“In hierdie stadium weet ons nie wat hom besiel het om af te spring nie,” het hy gesê.
Die pasiënt het uit die waarnemingseenheid ontsnap toe ’n sekerheidsbeampte die hek vir ’n dokter oopgemaak het.
Beraders, polisiebeamptes en dokters van die hospitaal het hom deurentyd probeer ompraat om nie te spring nie.
Terwyl hy ure lank op die randjie van die dak gewik en geweeg het, het hy verskeie verbale uitbarstings gehad.
Hy het onder meer beweer ’n dokter wil hom om die lewe bring en dat die sekerheidsbeamptes bewus was van ’n komplot in die hospitaal.
Volgens ’n omstander op die toneel,Tami Hlanza, wat die pasiënt vanaf die grond probeer ompraat het om nie te spring nie, het die man herhaaldelik gesê hy wil nie met hospitaalpersoneel praat nie.
Hlanza het aangebied om hom na die townships toe te vat, maar dit het die pasiënt nie laat kalmeer nie.
- Die Burger