Prokureur aangeval, vriendin verkrag
2010-09-24 08:30
Volksblad
Bloemfontein - Inwoners van die Bloemfonteinse woonbuurt Langenhovenpark is Woensdagaand geruk toe ’n bekende prokureur van die stad en ’n vriendin in sy huis aangeval en die vrou verkrag is.
Volgens lt.kol. Annelie Wrensch, polisiewoordvoerder, het die 66-jarige prokureur en ’n 58-jarige vriendin in sy huis in Jan Brand-straat televisie gekyk toe drie gewapende rowers hulle omstreeks 19:00 oorval het.
Die vermeende aanvallers het die man en sy vriendin toe glo aangerand en die vrou verkrag.
Volgens Wrensch het die vermeende aanvallers toegang tot die huis verkry deur ’n sekuriteitshek af te breek.
Hulle het elektriese toestelle en vuurwapens in twee motors gelaai, maar kon slegs met een van die motors vlug.
Die registrasienommer van die motor is aan alle polisiekantore in en om Bloemfontein gegee en lede van die Kopanong-polisiekantoor het die motor gesien.
Volgens Wrensch het die polisie ’n verdagte, wat in die motor was, in hegtenis geneem.
Hy het later nog vier verdagtes uitgewys wat ook in hegtenis geneem is. Wrensch sê al die gesteelde goedere is teruggekry, behalwe een vuurwapen.
Amanda Appelgryn, woordvoerder van die Bloemfontein-Medi-Clinic, sê die man is vir snywonde behandel en die vrou vir sagteweefselbeserings.
Volgens Appelgryn was die vrou erg getraumatiseer en moes sy berading ontvang.
Geregtelike mediese ondersoeke is ook op die vrou uitgevoer. Albei is ontslaan.
Wrensch sê die name van die slagoffers word verswyg, omdat die saak baie sensitief is.
Die vyf verdagtes verskyn Maandag in die Bloemfonteinse landdroshof op aanklagte van huisroof en verkragting.
- Volksblad