Prinsloo nie uitgelewer aan SA
2010-02-03 10:18
Johannesburg – Die Suid-Afrikaanse voortvlugtige, Dirk Prinsloo, sal eers sy 13 jaar tronkstraf in ‘n tronk in Belarus moet uitdien, voordat hy weer voet op eie bodem sal kan sit, het die nasionale vervolgingsgesag (NVG) Woensdag gesê.
"In die stadium het ons dit nog nie oorweeg om hom uit te lewer nie,” het Mthunzi Maga, woordvoerder van die NVG gesê.
“Ons glo dat die owerhede in Belarus hom sal deporteer sodra hy sy vonnis klaar uitgedien het. Hy sal dan op dieselfde klagtes soos Cézanne Visser teregstaan.”
Visser, Prinsloo se gewese vriendin, is skuldig bevind aan die onsedelike aanranding van kinders en korrupsie.
Sy sal op 8 Februarie gevonnis word.
Prinsloo is verlede jaar in Belarus in hegtenis geneem, nadat hy probeer het om ‘n bank te beroof.
Hy is Maandag tot 13 jaar tronkstraf gevonnis op aanklagtes van diefstal, aanranding en poging tot bankroof.
- Sapa