Prince boete opgelê ná hy dronk bestuur
2011-06-22 08:59
Kaapstad en Oudtshoorn - Truman Prince, die ANC se nuwe burgemeester in Beaufort-Wes, is verlede Woensdag in die Laingsburg-landdroshof skuldig bevind op ’n aanklag van dronkbestuur.
Prince se bloedalkoholvlak was 0,14g per 100mF, terwyl die wettige perk 0,05g per 100mF is.
Prince het skuld op die aanklagte beken en is ’n boete van R2 000 opgelê.
Die saak spruit uit ’n voorval op Saterdag 31 Julie verlede jaar toe Prince op die dorp onder die invloed bestuur het.
Hy is aangekeer en vier uur lank deur die polisie aangehou voordat hy op borgtog van R2 000 vrygelaat is.
Hy het op 7 Desember die eerste keer in die hof verskyn.
Die wettige perk vir bloedalkoholtoetse is 0,05g per 100mF en vir asemalkoholtoetse is dit 0,24g per 1000mF.
Prince kan volgens ’n munisipale bestuurder in een van die Karoodorpe steeds as burgemeester aanbly.
“Hy het mos nie ’n moord gepleeg nie,” het die bestuurder, wat gevra het om anoniem te bly, gesê.
Prince het nadat Die Burger hom Dinsdag die eerste keer vir kommentaar genader het, gesê hy is in ’n vergadering en moet later gekontak word. Hy het later gevra hoekom hy nie uitgelos kan word nie en navrae na sy prokureur, Willem Wagener, verwys.
Wagener het bevestig Prince het ná onderhandelings met die staat skuld op die aanklagte beken. “Ons het skuld beken en ’n boete betaal, maar dit het geen invloed op Truman se amp nie,” het Wagener Dinsdag gesê. “Dit is ’n alledaagse oortreding – nie dat ons dit afmaak as ’n geringe oortreding nie.
“Die feit dat hy bereid was om skuld te beken en die boete te betaal dui daarop dat hy erns maak van sy amp as burgemeester.”
Hy het bevestig dat Prince nou ’n misdaadrekord het.
Volg Nuus24 op Twitter.
- Die Burger