Pretoria of Tshwane? Minister weet self nie
2012-01-28 08:30
Pretoria – Paul Mashatile, minister van kuns en kultuur, het toegegee hy weet nie wat die hoofstad se naam is nie.
Hy het ook verras deur Vrydag te sê daar is geen aansoek op sy tafel wat hom versoek om Pretoria se naam na Tshwane te verander nie.
Dit is in skrille kontras met Kgosientso Ramokgopa, Tshwane se uitvoerende burgemeester, wat in November verlede jaar gesê het dié metro is in gesprek met Mashatile oor die finalisering van Tshwane se hoofstadstatus.
Mashatile, ook leier van die ANC in Gauteng, het Vrydag aan Beeld gesê daar is verwarring oor Pretoria se status as hoofstad.
“Daar is twee weergawes. Tshwane sê dié naam is lank reeds die hoofstad se naam en wil hê die woonbuurt Pretoria se naam moet verdwyn.
“AfriForum-hulle sê weer Pretoria is steeds die hoofstad se naam. Die groepe moet met mekaar in gesprek tree.”
Hy het gesê die vraag is of ’n woonbuurt (Pretoria) as ’n hoofstad gereken kan word.
Tshwane het in die era van dr. Gwen Ramokgopa, sy vorige burgemeester, voet by stuk gehou Pretoria se naam is sedert 2000 – toe Tshwane as ’n metromunisipaliteit tot stand gekom het – net in die middestad tussen DF Malanrylaan en Du Toitstraat geregistreer.
Haar opvolger, Kgosientso Ramokgopa, het aangedui Pretoria is steeds die stad se naam en daarom die aansoek om dit te verander.
Dit beteken die stad en munisipaliteit sal as Tshwane bekendstaan.
Mashatile het gesê hy het nog geen so ’n aansoek ontvang nie.
Die Tshwane-raad het intussen sy beleid vir die benaming van openbare plek- en straatname eergister op ’n vergadering gewysig.
Opposisiepartye meen die ANC sal met die nuwe beleid makliker straatname kan verander.
Die DA sê hy is bekommerd oor belangrike klousules wat in die slag gebly het.
Een van dié klousules behels dat meer as 51% van inwoners of sakelui in ’n straat ’n voorgestelde naam moet goedkeur.
Dr. Conrad Beyers van die VF+ sê die gewysigde beleid gaan dit beslis makliker maak om straatname eensydig te verander.
“Dit kan ’n resep vir konflik wees. Ons glo aan ’n gee-en-neem-benadering en besef daar is name in die stad wat nie volhoubaar is nie.”
– Volg Nuus24 op Twitter
- Beeld