President se nuwe straler is 'buitensporig' – DA
2011-11-06 17:59
Johannesburg – Die R1,6 miljard wat die staat na verwagting op twee nuwe langafstand-stralers vir President Jacob Zuma en sy adjunk sal spandeer, is “eenvoudig verkeerd”, het die DA Sondag gesê.
“Die feit is dat dit eenvoudig verkeerd is om R1,6 miljard op sake-stralers te spandeer terwyl miljoene mense in ons land nie behuising of toegang tot basiese dienste het nie,” het David Maynier, DA-LP, in ‘n verklaring gesê.
Die departement van verdediging het bevestig dat 'n tender uitgereik is vir die aankoop van twee nuwe stralers vir die eksklusiewe gebruik van Zuma en Motlanthe.
Ndivhuwo Mabaya, woordvoerder vir die departement van verdediging, het gesê die departement is besig om te besluit of die vliegtuie gekoop of gehuur sal word.
“Dit is verregaande buitensporigheid vir President Jacob Zuma en Adjunk-President Kgalema Motlanthe om albei langafstand-stralers te hê,” het Maynier gesê.
Maynier het gesê hy sal ‘n vergadering met die minister van verdediging, Lindiwe Sisulu, reël om volledig ingelig te word oor die proses.
- Volg Nuus24 op Twitter
- SAPA