'President moet kant kies in rasse-debakel'
2011-03-03 08:08
Kaapstad - Pres. Jacob Zuma sal moet kies watter kant hy staan van die rasse-debakel wat tans op senior vlak in sy regering woed, het ontleders Woensdag gesê.
“Die ANC het ’n beslissende punt in sy geskiedenis ná apartheid bereik,” het dr. Fanie du Toit van die Instituut vir Geregtigheid en Versoening gesê.
“Gaan hy toelaat dat etnisiteit en broederbonde die lyne van die regering bepaal, òf gaan hy hou by sy tradisie dat die ANC ’n party vir alle mense is?
“Zuma sal moet sê aan watter kant hy hom skaar.”
Dit volg nadat Trevor Manuel, minister in die presidensie, ’n striemende aanval in die media op die regering se omstrede woordvoerder, Jimmy Manyi, gedoen en hom vir ’n rassis in die klas van dr. H.F. Verwoerd uitkryt het.
Du Toit het gesê Manuel verteenwoordig een paradigma binne die ANC wat menseregte voorstaan, terwyl Manyi die idee van etnisiteit en “baantjies vir boeties” verteenwoordig.
“En met etnisiteit bedoel ek enige groep mense wat lojaal staan teenoor mekaar, ongeag of dit rondom kleur, sake-idees of enige ander kwessie is.
“Zuma sal moet besluit of hy nie-rassigheid wil nastreef en of hy mense soos Jimmy Manyi wil verduur.”
Du Toit, sowel as prof. Pierre de Vos, grondwetkenner verbonde aan die Universiteit van Kaapstad, meen dit is ongekend en treffend dat Manuel hom so sterk uitgespreek het.
De Vos het gesê Zuma se leiding is nou nodig om die saak te beredder. Hy meen dit is onwaarskynlik dat Manuel sy uitsprake in die openbaar sou doen as hy nie ondersteuning binne die ANC daarvoor het nie.
“Ek sal nie verbaas wees as daar straks oor gekoukus is nie. Dit lyk ook asof hy heeltemal uit die hart gepraat het.”
Volgens De Vos is die rasse-spanning wat nou gesien word, iets wat onder die oppervlak geprut het.
“Onder bruin mense, Afrikane en Indiërs is daar mense met nog groot vooroordele en verskille. Dit help nie om te maak asof dit nie bestaan nie.”
- Volksblad