President die kop gewas
2010-02-08 06:07
Pieter du Toit
Kaapstad - Pres. Jacob Zuma loop vir eers nie die gevaar om soos oudpres. Thabo Mbeki uit die Uniegebou herroep te word nie, maar hy gaan wel deur senior partyleiers die kop gewas word.
Indien hy egter nie finaal oop kaarte met die ANC se leierskap speel oor sy private lewe nie, is dit nie onmoontlik dat hy dieselfde paadjie as Mbeki kan loop nie, omdat enige verdere onbetaamlikhede die party min ruimte sal laat om hom te steun.
Gwede Mantashe, die ANC se sekretaris-generaal, en adj.pres. Kgalema Motlanthe, die party se onderleier, is volgens ingeligtes die aangewese partygenote wat aan Zuma die erns van die saak gaan verduidelik.
“Hulle gaan hom sê die verlede is in die verlede, maar dat hy homself in hemelsnaam nie weer in só ’n posisie moet plaas nie. As dit weer gebeur, gaan die ANC geen keuse hê as om baie sterk standpunt in te neem nie,” het ’n gesagsfiguur op voorwaarde van anonimiteit gesê.
Dít het gister te midde van hernude berigte oor nóg Zuma-kinders aan die lig gekom. Zuma was gistermiddag in die Paarl terwyl die ANC probeer het om sy “nagmerrieweek” agter hom te sit en voor te berei op die staatsrede en die herdenking van oudpres. Nelson Mandela se vrylating uit die gevangenis eerskomende Donderdag.
Dis glo veral Mantashe, wat onlangs sy 25ste huweliksherdenking gevier het en sy troubeloftes aan sy vrou herhaal het, wat Zuma se optrede onaanvaarbaar vind. Daar is gister aan Die Burger gesê: “Daar is reeds ’n geruime tyd ongelukkigheid oor sy private lewe. Die nuutste voorval is egter die ergste van almal. As dit weer gebeur, sal ons ’n resolusie oor die kwessie moet aanneem.”
ANC-leiers én LP’s het glo die afgelope week bontgestaan om die party se standpunt aan ondersteuners en kiesafdelings te verduidelik.
Een ANC-leier het gesê hoewel daar wye ongelukkigheid oor Zuma se private lewe is, sal dit nêrens formeel beslag kry op ’n agenda of op leiersvergaderings nie. Die saak sal in die agtergrond en op ’n informele wyse bespreek en bestuur word. “As dit op ’n politieke grondslag oorweeg moet word, kan daar net een uitkoms wees. En dis nog nie nou die tyd daarvoor nie.”
Brian Sokuto, ANC-woordvoerder, het gesê die kwessie word nou as afgehandel beskou en dis nie amptelik op die sakelys vir vandag se beplande vergadering van die nasionale werkkomitee nie.
Die ANC se vroueliga het ook gister sy steun aan Zuma toegesê. Nosipho Ntwanambi, adjunkpresident van die vroueliga, het by navraag gesê hulle aanvaar Zuma se verskoning “onvoorwaardelik”.
“Hy het sy fout erken en skadevergoeding betaal. Ons dink nie dit het die ANC of sy beleidsrigtings enige skade berokken nie... buitendien, Zuma is MIV-negatief en word gereeld getoets,” het sy gesê.
Zuma ontmoet inwoners van Guguletu vandag as deel van ANC-vieringe rondom Mandela se vrylating destyds.
- Die Burger