Presidensie swyg oor 'afpersing'

2012-11-19 08:04

Johannesburg – Die presidensie weier om kommentaar te lewer op bewerings dat pres. Jacob Zuma tydens sy bedrogverhoor probeer het om die destydse Skerpioene af te pers, berig Eyewitness News.

Die aanklagte van bedrog en geldwassery is in 2009 laat vaar.

Die Sunday Times het die naweek gesê hy het sowat 300 bladsye van interne kommunikasie wat aan die media gelek is. Dit sluit in notules van vergaderings met Zuma se regsverteenwoordigers.

In dié e-posse word na bewering onthul dat die Skerpioene se vervolgingspan geglo het hulle word deur Zuma afgepers.

Die span het glo ook gedink dat Zuma van plan was om inligting oor die spioenasiebande vry te stel wat die Nasionale Vervolgingsgesag (NVG) in die verleentheid sou stel.

Staatsaanklaers het ook na bewering geglo dat hulle 'n sterk saak teen die president het, en het die NVG se destydse hoof, Mokotedi Mpshe, aangeraai om voort te gaan met Zuma se vervolging.

Die presidensie weier egter om kommentaar te lewer op enige van die bewerings.
 
– Lees meer hier

– Volg Nuus24 op Twitter