Presidensie swyg oor Zuma-baba se voordele
2010-02-05 00:08
Kaapstad – Die presidensie wou nie Donderdag kommentaar lewer oor óf Jacob Zuma se liefdeskind by Sonono Khoza, dogter van die sokkerbaas, Irvin Khoza, sal kwalifiseer vir enige staatsvoordele nie.
“Indien julle die vraag vra, is julle besig om dinge ‘n bietjie te ver te neem,” het Zizi Kodwa, woordvoerder van die presidensie gesê.
“Die president is onder verpligting om hieroor te praat nie. Ons twyfel nie dat hy sy verantwoordelikheid nagekom het nie. Daar is ‘n geboortesertifikaat wat aandui dat Jacob Gedleyihlekisa Zuma as die pa van die kind geregistreer is.”
Volgens Kodwa moet Zuma die besluit neem oor of sy vier maande oue dogtertjie vir die Parmed-mediesefonds in aanmerking kom, waarvoor die staat ‘n bydrae van twee derdes maak.
“Die president mag dalk meer as een polis het.”
In terme van die handboek vir lede kwalifiseer hul kinders vir vervoer skool toe en ses gratis plaaslike vlugte per jaar. Die staat dek egter nie hul skoolfooie nie.
Die koste van Zuma se uitgebreide huishouding is nou al vir lank die onderwerp van spekulasie, sedert hy weer verlede jaar getrou het, en nou drie presidentsvroue het.
Sy vrouens kwalifiseer vir mediesefonds en reisvoordele.
Zuma het Woensdag erken dat hy verlede jaar ‘n liefdeskind by Sonono Khoza verwek het.
- Sapa