Presidensie reageer op Afrikaner-uitlatings
2013-02-28 12:07
Johannesburg – Geen kulturele groep moet blameer word vir die toename in geweld teen vroue en kinders nie, het die presidensie Donderdag gesê.
"Ons wil die Afrikaner-gemeenskap en alle Suid-Afrikaners verseker dat die regering se toewyding aan nie-rassigheid en diversiteit, soos uiteengesit in die land se grondwet, onwrikbaar bly," het Mac Maharaj, presidensiële woordvoerder, gesê.
Dít volg nadat Lulu Xingwana, minister van vroue, kinders en gestremdes, om verskoning gevra het vir haar uitlatings oor Afrikaner-mans.
"Die bydrae van Afrikaner-mans in die stryd teen geslagsgebaseerde geweld en ook tot die bou van 'n verenigde, besorgde en voorspoedige Suid-Afrika, is net so waardevol soos dié van alle Suid-Afrikaners."
Xingwana het aan die Australiese Uitsaaikorporasie (ABC) gesê jong Afrikanermans word grootgemaak om te glo dat hulle vroue en kinders "besit".
"Jong Afrikanermans word grootgemaak in die Calvinistiese geloof en glo hulle besit 'n vrou, hulle besit 'n kind, hulle besit alles, en daarom kan hulle daardie lewe neem, want hulle besit dit," het sy gesê.
"Ons het ook kulturele verskille in ons eie gemeenskappe waar ons vroue het wat gedwing word om te trou en ons hanteer al daardie sake."
ABC het 'n onderhoud met Xingwana gevoer oor die dood van die Paralimpiese kampioen Oscar Pistorius se vriendin, Reeva Steenkamp.
Die insetsel, wat Maandag uitgesaai is, fokus op vuurwapengeweld in Suid-Afrika.
"Dit het vir my duidelik geword dat my kommentaar sommige lede van ons gemeenskap ontstel het.
"Ek wil, gevolglik, daardie kommentaar terugtrek en onvoorwaardelik om verskoning vra aan hulle," het Xingwana in haar verskoning gesê.
– Volg Nuus24 op Twitter
- SAPA
