Presidensie 'nie bewus' van planne om Cele te skors
2011-09-25 16:56
Johannesburg – Die Presidensie is “nie bewus” van enige planne om die nasionale polisiekommissaris, genl. Bheki Cele, te skors nie, het ‘n woordvoerder Sondag gesê.
“Ek is nie bewus van enige brief wat voorberei word [vir Cele se skorsing] nie. Die berigte is gebaseer op gerugte,” het Mac Maharaj gesê.
Hy het gesê ‘n berig in die Sunday Times, waarin gesê is Cele se skorsing is naby, kan “bydra tot onstabiliteit in polisiebestuur”.
In dié berig is gesê President Jacob Zuma sal na verwagting Cele se skorsingsbrief vandeesweek onderteken wanneer hy (Zuma) van Amerika af terugkeer.
Maharaj het gesê ‘n aanhaling, wat aan hom toegeskryf is, rakende Cele se beweerde skorsing is “uit konteks gehaal”.
Die aanhaling van Maharaj het gelui: “Hierdie het die potensiaal om tot onsekerheid binne die polisiemag te lei en dit is nie goed (in die stryd teen misdaad) nie.”
Cele se woordvoerder, Nonkululeko Mbatha, was nie onmiddellik vir kommentaar beskikbaar nie.
Die openbare beskermer, Thuli Madonsela, het in verslae gedui op wanadministrasie wat deur Cele gepleeg is.
Lees hier meer oor die mees onlangse verwikkelinge.
- Volg Nuus24 op Twitter
- SAPA