Presidensie distansieer hom van Heath
2011-12-10 16:44
Johannesburg – Die presidensie het hom Saterdag gedistansieer van enige bewerings wat deur die nuwe hoof van die presidensie se spesiale ondersoekeenheid (SOE), Willem Heath, gemaak is teen oudpres. Thabo Mbeki.
"Die presidensie en die regering oor die algemeen het hoegenaamd niks te doen met die uitlatings wat deur mnr Heath gemaak is nie," het Mac Maharaj, die presidensiële woordvoerder, in 'n verklaring gesê.
"Geen van die aantygings wat deur mnr Heath gemaak is, het enigiets te make met sy rol as die hoof van die SOE nie."
Heath het in 'n onderhoud met City Press beweer oudpres. Thabo Mbeki sit agter die aanklagte van verkragting en korrupsie teen pres. Jacob Zuma voor Zuma as die land se president verkies is.
Zuma is in 2006 vrygespreek op 'n aanklag van verkragting en 'n aanklag van korrupsie is laat vaar.
Heath het gesê Mbeki het aan die nasionale vervolgingsgesag (NVG) “voorgeskryf” in Zuma se verkragtingverhoor.
“Hulle (Shaik en Tony Yengeni) is opgeoffer. Dit was maklik om hulle te offer. En toe inisieer Mbeki natuurlik Zuma se vervolging. Nie net wat betref die korrupsieaanklagte nie, maar ook die verkragtingsaak.
“Hy (Mbeki) het aan die NVG voorgeskryf watter besluite hulle moet neem. Ek kan nie die bewyse aan jou verklap nie, maar daar is oor die algemeen geen twyfel nie dat hy ’n sterk sê in daardie besluite gehad het en tog was die NVG veronderstel om onafhanklik te wees,” het Heath gesê.
– Volg nuus24 op Twitter.
- SAPA