Premier steun Sasolburg-taakspan
2013-01-23 10:34
Bloemfontein – Ace Magashule, premier van die Vrystaat, het gesê hy ondersteun die aanstelling van 'n taakspan om kwessies van munisipale afbakening in die provinsie te ondersoek.
Richard Baloyi, minister van samewerkende regering, het Dinsdag aangekondig dat 'n taakspan aangestel sal word.
Altesaam 238 mense is vir openbare geweld en saakbeskadiging in Zamdela in hegtenis geneem sedert die geweld Sondag begin het.
Twee mense het weens die betoging gesterf.
Die geweld, wat Sondag begin het, is veroorsaak deur planne om die Sasolburg- en Parys-munisipaliteit saam te smelt. Richard Baloyi, minister van samewerkende regering, het Dinsdag aangekondig dat samesmelting, wat in 2016 sou plaasvind, laat vaar is.
Mondli Mvambi, Magashule se woordvoerder, het gesê die taakspan sal 'n verdere geleentheid bied om te vergader oor die verskeie opsies wat reeds voorgestel is.
Die span sal ook nuwe moontlikhede kan toets om die probleme wat met die huidige afbakening in die Vrystaat ervaar word, aan te spreek.
Magashule het alle belangstellende partye aangemoedig om deel te wees van die konsultasieproses.
Hy het vroeër gesê geweld en wetteloosheid soos dié in Sasolburg sal nie geduld word nie.
Die premier het verder gesê hy het volle vertroue in die polisie en nasionale vervolgingsgesag om die kriminele dade te ondersoek en die skuldiges te straf.
– Volg Nuus24 op Twitter
- SAPA
