Premier ontken korrupte verhouding met Malema
2011-07-26 08:03
Polokwane – Die provinsiale regering van Limpopo se tenderprosesse is nie korrup nie, het Cassel Mathale, die provinsie se premier, Maandag gesê.
Dit volg nadat City Press Sondag berig het Julius Malema, president van die ANC-jeugliga, sorg glo dat tenders in Limpopo toegeken word in ruil vir geld wat in die Ratanang-familietrust, waarvan hy die enigste begunstigde is, betaal word. Malema is ’n boorling van Limpopo en ’n boesemvriend van Mathale.
Mathale het gesê die berigte oor Malema is “misleidend en verkeerd”.
Luidens ’n verklaring van sy kantoor is is 44 regeringsamptenare onlangs afgedank weens hul beweerde betrokkenheid by korrupsie en bedrog. Dit is nie bekend watter poste die amptenare beklee het nie.
Hy het ook gesê “sowat 40” maatskappye is op ’n swartlys geplaas weens hul beweerde betrokkenheid by korrupsie met die bou van Hop-huise.
Soviet Lekganyane, LUR vir plaaslike regering en behuising, het egter twee weke gelede aangekondig slegs 24 maatskappye se name is aan die nasionale tesourie gegee sodat hulle op ’n swartlys geplaas kan word.
Die ANC in Limpopo het gister ’n beroep op die party se lede gedoen om nie “enige openbare uitlatings te maak wat dit laat lyk dat van die party se lede met beweerde korrupsie verbind kan word nie”.
Joe Maswanganyi, sekretaris-generaal van die ANC in Limpopo, het die berigte oor Malema veroordeel. Hy het gesê die bewerings is “baie goed beplan”. Volgens hom is dit ’n politieke strategie om die ANC en sy leiers se naam skade aan te doen.
Intussen het Cope in Limpopo Maandag aangekondig hy gaan die openbare beskermer ook vra om ’n ondersoek te doen na die bewerings van korrupsie teen Malema.
Cosatu in Limpopo wil ook hê ’n ondersoek moet na Malema gedoen word. Dan Sebabi, provinsiale sekretaris-generaal van die vakbond, het gesê diegene wat sake met die regering doen moet ook ondersoek word.
- Beeld