Predikant ontslaan oor gay huwelik
2010-02-19 09:01
Johannesburg - Daar is woede en ontsteltenis by ’n klomp Suid-Afrikaanse Metodiste ná ’n beslissing dat ’n geliefde predikant weens haar gay huwelik ontslaan moet word.
Eerw. Ecclesia de Lange van Kaapstad is in Desember met haar gay lewensmaat getroud en in Januarie deur die kerk geskors.
Haar appèl teen dié vonnis is nou van die hand gewys en die appèlkommissie het beslis dat sy ontslaan moet word.
Dié besluit moet nog deur biskop Ivan Abrahams, leier van die Metodistekerk, bekragtig word, maar dis glo net ’n formaliteit. Abrahams en eerw. Vuyani Nyabolo, hoofsekretaris van die kerk, was nie Donderdag beskikbaar vir kommentaar nie.
Intussen gons dit op die Ecclesia de Lange-ondersteunersgroep se blad op Facebook.
’n Deelnemer bestempel die Metodistekerk daarop as ’n Judaskerk omdat dit met dié beslissing sy eie boodskap van ’n inklusiewe geloofsgemeenskap verraai het.
’n Predikant wil weet hoe hulle voortaan van die kansels af kan verkondig dat Jesus almal onvoorwaardelik aanvaar as die Metodistekerk self voorwaardes stel.
De Lange self het op die blad gesê die beslissing was ’n skok, maar die ondersteuning wat sy gekry het, was oorweldigend.
Sy win advies in en wag nog op die amptelike brief voordat sy ’n verklaring uitreik.
De Lange kan blykbaar nog aansoek om arbitrasie langs die kerklike kanale doen.
Daarna is daar ook die opsie om die beslissing op prosedurele en grondwetlike gronde in ’n hof te betwis.
- Beeld