Potch sal onherkenbaar wees – Zille
2011-03-28 08:24
Beeld
Potchefstroom – ’n Blou golf het gister deur Promosa, die tradisionele bruin woonbuurt in dié stad, gespoel toe Helen Zille, leier van die DA, en Patricia de Lille, OD-leier en Kaapstadse burgemeesterskandidaat, hier besoek afgelê het.
Zille, wat ’n paar inwoners se huise besoek het om na hul klagtes oor die plaaslike regering te luister, het onder meer dié party se burgemeesterskandidaat bekend gestel met die oog op die munisipale verkiesing.
Dié kandidaat, DA-LP Juanita Terblanche, is optimisties oor die DA se kans om die meeste stemme in Potchefstroom te kry as die stemuitslae met die registrasiesyfers ooreenstem.
“Daar is ’n wesenlike moontlikheid dat ons Potchefstroom kan vat. Die registrasiesyfers, 14,7%, is die hoogste in die land vir ’n gebied wat nie voorheen ’n DA-gebied was nie.”
Zille het gesê in 2004 het die DA 27% van die stemme in die Wes-Kaap op hom verenig en 42% tydens die volgende verkiesing, waarna hulle toe ’n koalisie kon vorm.
“Met die laaste verkiesing in Potch het ons 27% gekry, sonder die OD. Enigiets is moontlik.”
Inwoners van Promosa het met hul blou DA-hemde langs die straat gestaan toe Zille en De Lille agter op ’n bakkie deur die woongebied gery het. Kort hierna het sowat 400 mense na die toesprake in die Promosa-park gaan luister.
“Vir die eerste keer kan u, die kieser, die rekords van twee partye in regering met mekaar vergelyk. Nou kan jy vir jouself afvra: ‘Waar het die lewe vir almal beter geword?
Onder die ANC of onder die DA?’ Elke laaste peiling wat gedoen is, wys dat die lewe vir almal verbeter het onder die DA,” het Zille gesê.
Volgens Zille sal die inwoners van Potchefstroom hul stad nie herken nadat die DA vir vyf jaar lank aan die bewind was nie. Zille het gesê die DA lewer meer dienste aan almal, asook meer gratis dienste en skep stapsgewys werk.
“Dit help nie om op 18 Mei vir die ANC te stem en in Augustus te toi-toi teen swak dienslewering nie.”
- Volg Nuus24 op Twitter.
- Beeld
