Poskantoor wil niks sê oor miljoene se diefstal
2012-01-16 07:03
James-Brent Styan en Sapa
Kaapstad – Die Poskantoor het Sondag nuusberigte oor die diefstal van nagenoeg R42 miljoen uit sy Posbank-afdeling veroordeel en gesê dit doen skade aan enige ondersoek wat na die voorval gedoen word.
Lungile Lose, poskantoor-woordvoerder, het Sondagmiddag gesê die Poskantoor wil nie oor die saak praat nie.
Hy wou nie die bedrag wat gesteel is (en die naweek in nuusberigte genoem is) bevestig of ontken nie.
“Ons wil nie die saak in die media bespreek nie. Dit waarsku die misdadigers en bemoeilik die polisie se werk,” het Lose gesê.
Volgens hom moet inligting wat betrekking het tot die ondersoek nie net “rondgegooi word in die openbaar nie, want dit benadeel die ondersoek”.
Luidens Sapa word die saak deur die Nasionale Intelligensie-agentskap (NIA) ondersoek.
Na wat verneem word, was ’n “hoëvlak-kuberruimte-sindikaat” verantwoordelik vir die misdaad. Die sindikaat het glo verskeie Posbank-rekeninge einde verlede jaar geopen.
Toegang tot die Posbank se stelsel is glo bekom met behulp van die rekenaar van een van die Poskantoor se werknemers in Rustenburg. Dié rekenaar is gebruik om geld oor te plaas na die rekenings wat die sindikaat geopen het. Die geld is daarna tussen 1 en 3 Januarie van kitsbanke in Gauteng, die Vrystaat en KwaZulu-Natal uit die rekeninge onttrek.
Die NIA was nie Sondag vir kommentaar beskikbaar nie.
Volg Nuus24 op Twitter
- Volksblad
