Porno-saak: ‘Kinders sal nie so iets versin nie’
2010-12-30 08:00
Johannesburg - Die agt beskuldigdes in die Pretoriase kinderpornografiesaak sal eers Dinsdag uitvind of hulle op borgtog vrygelaat sal word.
Die staat en die verdediging het Woensdag in die Pretoria-Noord-landdroshof hul betoë in die borgtogverhoor afgesluit en landdros Pierre Wessels het gesê hy sal op 4 Januarie uitspraak lewer sodat hy eers behoorlik oor al die feite kan besin.
Die beskuldigdes staan tereg op onder meer aanklagte van verkragting, onsedelike aanranding, die seksuele gereedmaking van minderjarige kinders, asook die vervaardiging, besit van en verspreiding van kinderpornografie.
Lara Cole, regsverteenwoordiger van beskuldigde drie en vier, het Woensdag aangevoer die staat se saak is “baie swak” omdat geen kinderpornografie of bewyse van die vervaardiging van kinderpornografie, soos “’n videokamera of ’n driepootstaander”, nog gevind kon word nie.
Sy het ook gesê die beskuldigdes se kinders is sonder behoorlike gronde van hul biologiese ouers verwyder “net omdat die ouers in hegtenis geneem is”.
“Die staat het nie ’n prima facie-saak nie en daar is geen behoorlike redes hoekom die kinders van hul ouers geskei moet word nie,” het Cole gesê.
Adv. Neels de Jager, regsverteenwoordiger van die ander beskuldigdes, het aangevoer veral die vroulike beskuldigdes is erg deur hul arrestasie en aanhouding getraumatiseer en dat al die beskuldigdes se sake-ondernemings en geldsake weens hul aanhouding in duie stort.
Die verdediging het aangevoer die agt beskuldigdes het hulle voorgeneem om, as hulle op borgtog vrygelaat word, nie in die regsproses in te meng nie. Hulle het geen vorige veroordelings het nie en hulle is nie ’n vlugrisiko is nie.
Adv. Tania Carstens, aanklaer, het hierteenoor in haar betoog gesê die staat het “absoluut” ’n prima facie-saak teen die beskuldigdes.
“Ons is in besit van verklarings van twee kinders uit twee huishoudings wat nie met mekaar kontak gehad het nie en wat byna presies dieselfde stories in detail vertel van hoe die beskuldigdes voor hulle seks gehad het en hoe hulle deur die beskuldigdes tot seksdade aangemoedig en gemolesteer is,” het Carstens gesê.
“Die verdediging voer aan die kinders maak stories op, maar kinders van so ’n jong ouderdom sal nie detail soos hoe moeg hul handjies geword het, die slegte smaak van orale seks of die pyn van anale penetrasie kan opmaak sonder dat hulle dit self deurgemaak het nie.”
Sy het gesê die staat het ook mediese verslae wat moontlike seksuele mishandeling by die kinders bevestig.
“Daar is boonop wel pornografiese video’s in die beskuldigdes se besit gevind,” het sy gesê. “Dit is wel nie kinderpornografie nie, maar ons vermoed sterk dit is aan die kinders vertoon en dít is opsig self ook ’n ernstige misdryf”.
Carstens het gesê die beskuldigdes het hul eie geloofwaardigheid vernietig met weersprekings, soos dat hulle net R500- borgtog kan bekostig “terwyl hulle klaarblyklik genoeg geld het om die hooggeregshof te wil nader”.