Popcru sien rooi oor Malema

2012-09-13 22:12

Johannesburg – Die pogings van Julius Malema, geskorste leier van die ANC-jeugliga, om die arbeidsbeweging in die land te destabiliseer, is verwerplik, het Popcru gesê.

“Die polisie-en-bewaardersunie (Popcru) is een van vele organisasies wat hard werk om te verseker dat daar stelsels in plek is om die arbeidsektor vreedsaam te beheer,” het Popcru in ‘n verklaring gesê.

“Ons gaan nie staan en kyk hoe al hierdie werk by die toilet afgespoel word deur ‘n magshonger verwerpeling nie. Popcru waarsku mnr Malema dat nie almal deur hom geflous word nie en dat hy as die bedrieër wat hy werklik is, blootgestel sal word.”

Die organisasie het bygevoeg dat die SAPD Malema in hegtenis moet neem as hy skuldig is aan aanhitsing.

“Ons is ook bewus dat Malema lede van die SAPD wil toespreek en ons vra ons lede om hom nie die kans te gee nie.”

“Alle lede is goed ingelig oor watter stappe hulle kan volg as daar geskille is, en hulle moet weet Popcru sal aanhou baklei vir hulle, soos ons die afgelope 22 jaar al doen.”

Die vakbond Solidariteit het twee klagte teen Malema gelê omdat hy mynwerkers na bewering aangehits het tot geweld.

– Volg Nuus24 op Twitter
 

- SAPA