Politici vlieg mekaar in die hare oor Vigsdag
2010-12-01 09:49
Kaapstad. – Die parlementêre debat oor die 16 dae van aktivisme teen geweld teen vroue en kinders asook Wêreldvigsdag het gister in die provinsiale parlement in ’n politieke moddergooiery ontaard.
Dit het gebeur toe politici mekaar oor en weer beskuldig het oor wie nou eintlik wat doen vir dié belangrike saak. Verder kon hulle ook nie saamstem oor wanneer sekere take uitgevoer moes gewees het nie.
Patricia de Lille, provinsiale minister van maatskaplike ontwikkeling, het in ’n stadium al vingerwysend na ANC-lede wat haar uitgejou het, geskree: “Julle het geen respek vir vroue en kinders nie!”
LPP’s het mekaar uitgejou en sprekers wat aan dié debat deelgeneem het by tye heeltemal oordonder.
Dit was ten aanskoue van lede van die publiek wat juis die debat oor dié netelige kwessie kom luister het.
Albert Fritz, provinsiale minister van gemeenskapsveiligheid, het gesê meer as 2000moorde op vroue is verlede jaar aangeteken.
Boonop is 50% meer kindermoorde vergeleke met dieselfde tydperk verlede jaar reeds vanjaar aangemeld.
Volgens Joyce Witbooi, ANC-LPP, is die kwessie meer as net vertoonstrikkies. “Dit is mooi en oulik om in dié tyd strikkies op die bors te dra, maar dit is belangriker om die saak op die hárt te dra sodat daar deurgaans ’n verbintenis tot die kwessie kan wees.”
Zodwa Magwaza, ANC-LPP, het die DA gekap oor sy “eng” veldtog teen geweld teen vroue, wat net op agterstallige onderhoudsgeld vir kinders fokus. “Daar is so baie kwessies wat nog aangespreek kan word,” het sy gesê.
Helen Zille, premier, het egter die DA-regering se veldtog verdedig en gesê geskeide pa’s wat nie onderhoud vir hul kinders betaal nie is ook ’n vorm van geweld.
- Volg Nuus24 op Twitter. Kliek hier.
- Die Burger