Polisise ondersoek rits verwante moorde
2012-10-20 10:44
Johannesburg – Die polisie ondersoek ‘n rits moorde wat verbind word met ‘n godsdienstige bediening, het die Saturday Star Saterdag berig.
Volgens die koerant is drie mense wat verbind word met Overcomers Through Christ in die afgelope drie maande vermoor.
Michaela Valentine (25) se lyk is verlede Donderdag in haar huis op die Oos Rand gevind nadat sy doodgesteek is. Natacha Burger (31) is keelaf gesny in ‘n kompleks in Centurion. Haar lyk is saam met haar buurvrou, Joyce Boonzaaier, gevind.
Die 68-jarige Boonzaaier het geen bande met die bediening gehad nie.
Pastoor Reg Benedixen se lyk is in Augustus in die tuin van sy huis gevind. Hy is ook keelaf gesny.
Die stigter van OTC, Ria Grunewald, het aan die Saturday Star gesê dat sy en ander lede van die bediening doodsdreigemente ontvang.
“Ek het SMS-boodskappe ontvang dat daar meer moorde sal wees van mense wat my preke bywoon,” het sy gesê.
Sy beweer ook dat hulle by een van hul byeenkomste tuisgemaakte petrolbomme gevind het.
“Die volgende week het vier bomme tydens ons byeenkoms onder ons geparkeerde voertuie ontplof en vier voertuie is beskadig,” het Grunewald gesê.
Sy beweer OTC is nie 'n bevrydingsbediening nie, maar 'n persoonlike bediening wat kinders teen satanisme, dwelms en seksuele immoraliteit waarsku.
– Volg Nuus24 op Twitter
- SAPA
