Polisievrou vas wat ammunisie verkoop
2011-12-11 18:36
Sapa – Twee mense, insluitend 'n polisievrou wat al drie jaar lank op stresverlof is, is in Kaapstad in hegtenis geneem vir die verkoop van ongelisensieerde ammunisie, het die Valke Sondag gesê.
Die inhegtenisname is gemaak ná speurders 'n wenk ontvang het oor 'n man wat polisie-uniforms en ammunisie aan die publiek verkoop, het McIntosh Polela, woordvoerder vir die Valke, gesê.
"'n Klopjag... is deur die Valke uitgevoer waartydens 'n agent die items van 'n polisiekaptein se medewerker gekoop het."
Volgens Polela het die man 'n klein hoeveelheid ammunisie van verskillende kalibers by 'n parkeerterrein aan die agent afgelewer.
Die man is R4 000 – in gemerkte note – vir die ammunisie betaal.
Die polisie het die man daarna in hegtenis geneem en op die gemerkte note beslag gelê.
Nadat hy in hegtenis geneem is, het die man gesê hy ontvang sy voorraad van 'n vroulike polisiekaptein.
Die polisie het daarna die kaptein se woonstel in Palm Springs besoek.
Ongelisensieerde ammunisie en polisie-uniforms is gevind toe die polisie haar huis deursoek het.
"Sy het hierdie uniforms en ammunisie aan bendelede verkoop, of wie-ookal bereid was om die prys daarvoor te betaal," het Polela gesê.
Die polisiekaptein en haar medewerker sal na verwagting Maandag in die Kaapstad-landdroshof verskyn.
– Volg Nuus24 op Twitter.
- SAPA