Polisievrou in eie kantoor geboei

2013-01-15 10:25

Bloemfontein – Die bevelvoerder van die Wrenchville-polisiekantoor buite Kuruman, Noord-Kaap, is in haar eie kantoor deur haar kollegas weens klagte van roof in hegtenis geneem.

Volksblad berig kapt. Anna Phorotlho (42) is vasgetrek in verband met talle rooftogte verlede jaar by winkels wat deur buitelanders besit word.

Rowers beweer die polisiebeampte het hulle in ’n polisievoertuig by een van die winkels afgelaai en hulle aangesê om die plek te beroof. Sy het ook glo ‘n vuurwapen aan hulle verskaf.

Luidens die berig het inwoners vier rowers in verband met die voorval aangekeer en met sambokke bygedam. Een van die vermeende rowers is later in die hospitaal aan sy beserings dood.

Die koerant berig ’n vuurwapen wat aan die staat behoort, lugtydbewyse en ’n onbekende bedrag geld is deur die polisie by die vermeende rowers gekry.

Phorotlho verskyn binnekort op Kuruman in die hof.

Volg Nuus24 op Twitter

- SAPA