Polisievrou beseer toe gesteelde bakkie haar tref
2012-01-09 17:01
Johannesburg – ‘n Metropolisiebeampte is beseer toe ‘n gesteelde bakkie haar by ‘n padblokkade raakgery het, het ‘n woordvoerder gesê.
Volgens supt. Wayne Minnaar is die polisievrou in ‘n ernstige, maar stabiele toestand.
Hy sê die man wat die gesteelde bakkie bestuur het, het nie by ‘n padblokkade op die Soweto-hoofweg gestop nie. Die bestuurder het die polisiebeampte in die proses raakgery.
“Daarna het hy teen ‘n stilstaande voertuig naby die N1 gebots,” het Minnaar vertel.
Die man het uit die motor gespring en probeer weghardloop, maar polisiebeamptes het hom by nabygeleë huise vasgetrek, het Minnaar gesê.
Daar word beweer dat die bakkie in Booysen gesteel is.
Volg Nuus24 op Twitter
- SAPA