Polisieversterkings na Sasolburg ontplooi
2013-01-21 17:50
Johannesburg – Polisieversterkings van Gauteng en Welkom is in Sasolburg ontplooi nadat inwoners van die Zamdela-woonbuurt verwoesting gesaai het, het die polisie in die Vrystaat Maandag gesê.
"Ons het nou mannekrag. Alles is onder beheer en ons wil dit so hou," het konst. Peter Kareli gesê.
Kareli het gesê sommige van die inwoners het teruggekeer huis toe, terwyl ander op die straathoeke gesit en verbygaande polisievoertuie met klippe bestook het.
Die betogings het Sondag begin nadat die munisipaliteit inwoners ingelig het oor nuwe planne vir die samesmelting van die Metsimaholo- en Ngwathe-munisipaliteit, het Beeld berig.
Inwoners het vroeër Maandag twee vragmotors aan die brand gesteek en twee polisiebeamptes in 'n -voertuig aangeval.
"Waterkanonne en rubberkoeëls is gebruik om die betogers in bedwang te bring. Die helikopter skiet ook rubberkoeëls," het Kareli gesê.
Richard Baloyi, minister van samewerkende regering, sal na verwagting Maandagmiddag met beamptes van die Fezile Dabi-munisipaliteit vergader om die betogers se griewe te bespreek.
Sowat 90 mense is Sondag in hegtenis geneem en staan tereg op aanklag van openbare geweld nadat hulle winkels in die woonbuurt geplunder het.
"Nóg mense is omstreeks 03:00 vanoggend [Maandag] in hegtenis geneem nadat hulle winkels geplunder het," het Kareli gesê.
Die getal mense wat sedert Sondag in hegtenis geneem is, is nog nie bekend nie, maar sowat 150 mense is na raming agter tralies.
Diegene wat Sondag in hegtenis geneem is sal na verwagting Maandag in die Sasolburg-landdroshof verskyn.
– Volg Nuus24 op Twitter
- SAPA
