Polisieverkragting op hoogste vlak aangevat
2010-03-09 09:40
Eugene Gunning
Knysna - Die polisie in die Wes-Kaap het Maandag op die hoogste vlak in die provinsie onderneem om saam te werk sodat die saak oor die beweerde verkragting van ’n vrou deur twee polisiebeamptes van Knysna opgelos kan word.
Komm. Mzwandile Petros, die Wes-Kaapse polisiehoof, het Maandag op ’n mediavoorligtingsessie hier gesê daar is die laaste tyd ernstige bewerings oor die polisie in Knysna gemaak.
Die een hou verband met die beweerde verkragtingsvoorval en die ander oor ’n verdagte wat verlede week in polisie-aanhouding gesterf het.
Petros het gesê hy het ’n gesprek met Eleanor Bouw-Spies, Knysna se burgemeester, gehad.
Hy het onderneem dat die sake tot op die been ondersoek sal word. Geregtigheid moet seëvier en die skuldiges moet agter tralies gesit word.
Petros het dit verwelkom dat die Onafhanklike Klagtedirektoraat (OKD) nou die verkragtingsaak hanteer en hy het sy vertroue in die instelling uitgespreek. In retrospeksie is dit eindelik beter dat die OKD nou betrokke is, het hy gesê.
Hy het tydens sy besoek opdrag aan die polisie in Knysna gegee om enige inligting oor die voorval dadelik na die OKD deur te gee.
DNS-toetse is afgehandel, maar hy kan nie kommentaar lewer daaroor nie, want die saak is nou in die OKD se hande.
Hy het nie die name van polisiebeamptes wat moontlik betrokke kan wees nie, maar dit is moontlik dat die OKD name het.
Daar moet getuienis wees voordat iemand geskors kan word en op verlof geplaas kan word. As die OKD egter vir hom inligting gee wat daarop dui dat polisiebeamptes betrokke is, sal hulle beslis geskors word.
Tydens sy besoek is veiligheidsmaatreëls in die dorp ook bespreek met die oog op die Wêreldbeker-sokkertoernooi. Frankryk en Denemarke se spanne gaan hul tuisbasisse hier vestig.
Veiligheidsmaatreëls gaan nou opgeskerp word en personeel van sy kantoor gaan na die dorp ontplooi word.
Meer as 2 500 polisiebeamptes in die Wes-Kaap is spesiaal in skarebeheer opgelei. Altesaam 120 van die groep kom van die Suid-Kaap.
Petros het gesê van nou tot 11 Junie gaan daar na misdaadbedrywighede in Knysna en omliggende dele gekyk word.
Dit sluit in dwelms, onwettige drankhandel en rooftogte.
Die polisie is voornemens om as deel van sy nalatenskap tot die toernooi die vergrote kapasiteit wat met die toernooi gevestig word, behoue te laat bly in Knysna.
- Die Burger