Polisiemanne voor ná man se dood
2010-03-05 09:00
Tisha Steyn
Knysna - Twee polisiebeamptes en ’n polisiereservis van hier is in hegtenis geneem nadat ’n verdagte in aanhouding gesterf het.
Die spanning was Donderdag tasbaar in die landdroshof hier waar twee van die drie vlugtig voor landdros L.C. Ndomo verskyn het.
Talle van hul kollegas het die hofverrigtinge saam met familielede gevolg.
Twee manlike polisielede is Woensdagaand en ’n reservis Donderdagoggend in hegtenis geneem in verband met die dood van Tom Meyer van Rheenendal.
Besonderhede was Donderdag skraps. Nie die staat of die verdediging het teen Donderdagmiddag die dossier onder oë gehad nie.
Meyer is die naweek in Rheenendal weens die besit van dwelms in hegtenis geneem.
Meyer het konst. Christopher Moos (beskuldigde 1) na bewering met ’n mes in die arm gesteek tydens ’n worsteling wat ontstaan het toe eersgenoemde hom na bewering teëgesit het.
Beskuldigde 2 (wie se naam nie genoem mag word nie omdat hy in die hospitaal was en nie kon verskyn nie) en beskuldigde 3, reserviskonst. Clint van Rooyen, het Moos na bewering gehelp om Meyer by die polisiekantoor hier agter uit die polisievoertuig te laai.
Beskuldigde 2 het Woensdagaand ná sy inhegtenisneming in die polisieselle siek geword en is in die hospitaal hier opgeneem.
Hy was Donderdag nog in afsondering en onder polisiebewaking in die hospitaal.
Daan Derksen, wat vir beskuldigde 2 verskyn, het versoek dat die saak tot 11 Maart uitgestel word vir ’n borgtogaansoek.
Derksen het die versoek ook namens John Gillespie, wat vir Moos optree, gerig. Gillespie was elders besig met werksaangeleenthede.
Van Rooyen het Donderdag om regshulp aansoek gedoen. Henriëtte Breedt kla aan namens die staat.
Omdat polisielede betrokke is, word die saak deur die Onafhanklike Klagtedirektoraat onder leiding van Gavin Meyer ondersoek.
Die twee beskuldigdes bly in aanhouding in die gevangenis hier.
Dit was nie duidelik wanneer beskuldigde 2 uit die hospitaal ontslaan sal word nie.
- Die Burger