Polisieman verkrag glo seun in sy woonstel
2012-11-29 07:00
Kaapstad – 'n Wes-Kaapse polisieman is in hegtenis geneem nadat hy glo 'n 14-jarige seun in Worcester verkrag het, het die onafhanklike polisie-ondersoekdirektoraat (Opod) gesê.
Die beampte, wat by die Worcester-polisiekantoor gestasioneer is, is Dinsdag in hegtenis geneem vir die beweerde misdaad wat op 30 Junie plaasgevind het, het Moses Dlamini, woordvoerder van die Opod, gesê.
Die seun was glo ten tyde van die voorval alleen tuis, omdat sy ma nagskof gewerk het.
"Daar was 'n klop aan die deur, maar toe die seun gaan kyk wie dit is, was daar niemand. Die slagoffer, wat bang was, het toe na sy buurman se woonstel gegaan en gesê iemand het aan hul deur geklop," het Dlamini gesê.
Die polisiebeampte het aan hom gesê om te sit en dat dit hy was wat aan die deur geklop het. Die tiener is toe na bewering verkrag.
Dlamini het gesê die seun het sy ma in Oktober van die voorval vertel, waarna die polisie in kennis gestel en die man in hegtenis geneem is.
Die man verskyn Donderdag in die Worcester-landdroshof.
– Volg Nuus24 op Twitter
- SAPA
