Polisieman vas vir korrupsie
2010-01-21 15:36
Johannesburg – ‘n Polisieman van Krugersdorp is in hegtenis geneem op aanklag van bedrog nadat hy glo ‘n man R5 000 borgtog gevra het en die geld vir homself gehou het.
‘n Vrou het glo vroeër vandeesweek na die polisiestasie gegaan en gesê haar man het haar verkrag. Sy wou nie dat hy in hegtenis geneem word nie maar eerder dat die polisie haar help om hom na ‘n rehabilitasiesentrum te stuur.
“Die polisieman het gesê sy moet haar man na die stasie bring. Toe hulle daar opdaag, het hy gesê hy is verplig om die man in hegtenis te neem en haar vir R5 000 borgtog gevra,” het supt. Lungelo Dlamini Donderdag gesê.
Die vrou het glo geld by haar suster geleen en ‘n tjek aan die polisieman gegee. Hy het dit die volgende dag gewissel.
Die tjek was deur die vrou se suster uitgemaak en die bank het haar gekontak om haar in kennis te stel dat die geld aan die polisieman uitbetaal is.
Sy het die polisie gekontak en die saak is ondersoek voor die polisieman op aanklag van bedrog in hegtenis geneem is.
- Sapa