Polisieman vas ná hy KFC-rower skiet

2013-01-23 10:34

Durban – 'n Polisiekaptein wat 'n rower in 'n skietgeveg by 'n kitskosrestaurant doodgeskiet het, is in hegtenis geneem vir moord, het die Onafhanklike Polisie-ondersoekdirektoraat (Opod) Woensdag gesê.

Die beampte is in hegtenis geneem op aanklag van moord en regsverydeling, het Moses Dlamini, woordvoerder van die Opod, gesê.

Hy sal na verwagting Woensdag in die Pinetown-landdroshof verskyn.

Speur.konst. Ajith Krishinlall is op 5 Oktober doodgeskiet en speurkonst. Jerome Ngoma is gewond in 'n rooftog by KFC in New Germany, Durban.

Destyds is berig dat die kaptein ook op die toneel was en een van die rowers geskiet het.

"In daardie tyd is berig dat die verdagte op die polisiekaptein losgebrand het. 'n Ondersoek is gedoen en daar is bevind dat dié weergawe vals is," het Dlamini gesê.
      
– Volg Nuus24 op Twitter

- SAPA