Polisieman tronk toe ná hy tiener skiet
2010-07-14 10:01
Durban – ‘n KwaZulu-Natalse polisieman is tot 15 jaar tronkstraf gevonnis in die landdroshof in Pinetown nadat hy in 2007 ‘n jong man doodgeskiet het, het die onafhanklike klagtedirektoraat (OKD) Dinsdag gesê.
“Konst. Mlondolozi Makhathini, destyds deel van die Harburg-polisiestasie, het Thamasanqa Abrahams (19) in Februarie 2007 in Kwandengezi doodgeskiet,” het Moses Dlamini, OKD-woordvoerder, gesê.
Abrahams het saam met ‘n vriend en sy jonger suster langs die pad gestaan toe Makhathini verby hul gejaag en hul byna omgery het.
Na bewering het Abrahams op Makhathini geskree omdat hy roekeloos bestuur het in ‘n area waar daar kinders was. Makhathini het glo woedend geraak en ‘n U-draai gemaak.
‘n Argument het tussen die jong man en die polisiebeampte uitgebreek waarna Makhathini vir Abrahams in die nek geskiet het. Hy het daarna op die vlug geslaan.
Abrahams het later in die hospitaal gesterf.
Volgens Dlamini het die OKD Makhathini die volgende dag in hegtenis geneem. Hy is op 25 Mei skuldig bevind en Maandag gevonnis.
Volg Nuus24 op Twitter.
- SAPA