Polisieman sterk aan na skietery
2009-09-15 10:35
Pretoria- ‘n Lid van die polisie, wat in albei sy bene gewond is na ‘n skietery tussen die polisie en transitorowers in Kameeldrift, sterk goed aan in die hospitaal.
“Hy het reeds ‘n operasie ondergaan en sterk in die hospitaal aan. Sy toestand is stabiel en dit gaan goed met hom,” het dir. Sally de Beer, van die polisie, gesê.
Die polisieman is Maandagoggend tydens die skietery beseer en het dieselfde aand nog ‘n operasie ondergaan.
Sekuriteitswagte van Coin Security het die polisie gekontak nadat hulle twee verdagte voertuie opgemerk het wat hulle agtervolg het.
Die spesiale taakmag sowel as die lugvleuel van die polisie is ingeroep. Met hulle aankoms op die toneel het die rowers op die transitowa losgebrand.
Ses van die vermeende rowers is doodgeskiet en drie het gevlug. “Ons volg nog die inligting op. Geen verdagtes nog in hegtenis geneem nie,” het De Beer gesê.
–Sapa