Polisieman skiet vrou, homself
2010-01-21 06:47
Maygene de Wee
Nuwe Kruispad - ’n Polisieman van Nuwe Kruispad het Dinsdag sy vervreemde vrou doodgeskiet en daarna sy suster gevra om soos “ ’n ma vir sy kind te sorg”.
’n Rukkie later het konst. Zola Nomwebu (35) homself doodgeskiet, met die polisie op sy hakke.
Nomwebu, wat aan die polisie se beskermingseenheid in Kaapstad verbonde was, het Dinsdag omstreeks 17:40 sy vervreemde vrou, Nontsikelelo, en hul kind ontvoer.
Hy het sy vrou geskiet en in sy motor se bagasiebak by ’n vriend se huis in Khayelitsha gelos, het kapt. Ntomboxolo Sitshitshi, Nyanga se polisiewoordvoerder, gesê. Nomwebu was nie tydens die voorval aan diens nie.
Sy suster, Portia Nomwebu (19), het gesê hy het kort nadat hy sy vrou geskiet het met ’n ander voertuig met die kind (ongeveer vier jaar oud) by sy ouerhuis in Nuwe Kruispad aangekom.
“Ek was by die winkel onder in die pad. Hy het stilgehou, my vasgedruk en gesoen en gesê hy is baie lief vir my.” Hy het haar gevra om “soos ’n ma lief te wees vir sy kind en die kind te versorg. Sy broek was vol bloed.”
Hy het daarna in die motor geklim en weggery.
“Ek en ons ma is onmiddellik na die polisiekantoor.”
Nomwebu het volgens Sitshitshi ’n man in Guguletu geskiet en ’n polisiebeampte in Philippi gewond. Hy het daarna die polisieman se Hyundai gekaap. Die twee mans sterk in plaaslike hospitale aan.
Die polisie het gesien hoe Nomwebu in Philippi die polisiebeampte se voertuig gekaap het. Hy het weggejaag en homself in Philippi in die kop geskiet voor hulle hom kon aankeer.
Nomwebu se bevelvoerder, sr. supt. Gerard Victor, het gesê almal by die eenheid is geskok en hartseer. Hy het gesê hy het eers ná die voorval gehoor dat Nomwebu probleme gehad het. “Of dit huweliksprobleme was, weet ek nie. Hy het nie sy probleme werk toe gebring nie.”
Nomwebu se familie was Woensdag besig om begrafnisreëlings te tref.
–Die Burger