Polisieman skiet glo 3-jarige
2009-11-09 19:09
Johannesburg – ‘n Polisiekonstabel se aansoek om borgtog is afgekeur toe hy in die Tembisa landdroshof verskyn het op aanklag dat hy glo ‘n drie-jarige kind doodgeskiet het.
“Konst. S. Malaka is Saterdag in hegtenis geneem nadat die kind geskiet is toe lede van die SAPD ‘n klopjag teen moordverdagtes uitgevoer het”, het Moses Dlamini, woordvoerder van die Onafhanklike Klagtedirektoraat (OKD), in ‘n verklaring gesê.
Malaka en ‘n vennoot het na ‘n adres in Klipfontein View gegaan nadat inligting oor die saak ontvang is. Daar het ‘n wit Hyundai buite die huis gestaan met ‘n bestuurder, passasier en die drie-jarige kind binne in.
Toe die mans nader aan die motor gegaan het, het Malaka gesien dat daar ‘n ‘pyp’ op hulle gerig is en gedink dit is ‘n vuurwapen.
“Hy het ‘n skoot in die rigting van die ‘vuurwapen’ gevuur en die kind is in die bors getref,” het Dlamini gesê.
Geen pyp of vuurwapen is in die motor gevind nie en die kind is op die toneel dood.
"Die ODK bekla die skietery van onskuldige slagoffers en moedig die polisie aan om meer versigtig te wees om soortgelyke sterftes te voorkom,” het Dlamini gesê.
Malaka se saak is tot 18 November vanjaar uitgestel.
- Sapa