Polisieman pleeg selfmoord ná gru-moord
2010-01-15 10:26
Welkom. – Die polisieman wat vandeesweek met sy dienspistool in die tuin voor sy huis in Welkom selfmoord gepleeg het, was baie ontsteld oor die driejarige meisietjie wat die dag ná Kersfees in ’n openbare toilet in Thabong vermoor is. Hy was een van die eerste polisiebeamptes op die grusame moordtoneel.
Sy ontsteltenis oor dié moord, geldelike én ander persoonlike probleme was moontlik die rede daarvoor dat insp. Michael Khoabane (47) van die polisie se gemeenskapdienssentrum in Thabong homself geskiet het.
Sy buurvrou, Evadne de Bruin, het Woensdagoggend die blitspatrollie gebel en hulle gevra om na Khoabane se huis in Welkom te gaan en met hom te praat omdat sy geweet het dat hy probleme het. Twee polisiebeamptes het haar omstreeks 10:00 by haar werkplek besoek, waar sy haar kommer oor Khoabane aan hulle oorgedra het. Sy het hulle gevra om hom te besoek, maar dit is glo nooit gedoen nie. Net ná 12:00 het hy selfmoord gepleeg.
“Ek het kort ná die dood van klein Onele Galada die dag ná Kersfees gesien iets pla vir Michael. Hy het my van sy skok oor Onele se dood vertel en ek het geweet hy het geldelike probleme.”
Volksblad verneem kollegas het hom Dinsdagmiddag besoek omdat hy Maandag en Dinsdag nie vir werk opgedaag het nie. Hy het glo toe gesê hy het nie hulp nodig nie.
Onele het Kersdag verdwyn en haar lykie is die volgende dag in ’n openbare toilet naby haar ouma se huis gekry. Sy is erg vermink en haar geslagsdele is uitgesny. Khoabane en ’n kollega was die eerste polisiebeamptes op die toneel nadat op die lykie afgekom is.
Sy vriendin, Morakane Moholo, het nog in hul huis in Arielstraat 109 gelê en slaap toe hy homself Woensdag geskiet het. Sy lyk, met die dienspistool in sy hand, is op die grasperk voor sy huis gekry nadat bure die skoot gehoor het.
Hy word oorleef deur vier kinders, Nanaki, Tshepang, Morema en Dimpho. Die begrafnis is volgende Saterdag.
- Volksblad