Polisieman kry lewenslank vir moord
2010-09-02 20:12
Bloemfontein – ‘n Polisieman van KwaZulu-Natal is in die Harrismith rondgaande hof tot lewenslange tronkstraf gevonnis vir ‘n moord en rooftog by die dorp se Sir Harry Motel in Junie 2009, het polisie in die Vrystaat Donderdag gesê.
Konst. Nsizwe Alpheus Mazibuko is tot lewenslange tronkstraf gevonnis vir moord, het polisiewoordvoerder Mmako Mophiring gesê.
Hy is verder tot 15 jaar tronkstraf gevonnis vir roof en 12 jaar vir poging tot moord.
Die Sir Harry Motel is in Junie 2009 deur twee mans beroof wat voorgegee het dat hulle vir ‘n groep mense ‘n bespreking wil maak.
Nadat hulle mense in die kroeg beroof het, het die paar gevlug en twee besoekers buite die hotel geskiet nadat hulle die twee as polisie misgis het.
John Maputle van Pinetown is doodgeskiet en Andrew Grant Illmanm,ook van Pinetown, is beseer.
Hulle werk vir dieselfde maatskappy en was op pad om by die motel in te teken.
Mazibuko is later gevind en in KwaZulu-Natal in hegtenis geneem terwyl hy aan diens was.
Sy medepligtige is steeds op vrye voet.
Volg Nuus24 op Twitter
- SAPA