Polisieman in intensiewe sorg ná skietery

2012-10-18 10:46

Kaapstad – ‘n Kaapse polisiebeampte is in ‘n stabiele, maar ernstige toestand nadat hy in die maag geskiet is, het ‘n koerant berig.

Cape Times berig Kevin Rodgers (29) is in ‘n intensiewe sorgeenheid. Hy is Dinsdagaand geskiet toe hy drie mans in Belhar voorgekeer het.

Die drie verdagtes – tussen die ouderdom van 18 en 24 – het weggehardloop en is kort daarna in hegtenis geneem.

Rodgers is een van die 153 polisiebeamptes wat vanjaar in die Wes-Kaap geskiet is. Vier van dié polisiebeamptes het gesterf.

Dié skietery volg nadat drie polisiebeamptes verlede week doodgeskiet is. Die konstabels Mandisi Nduku (27) en Phindiwe Nikani (26) is Vrydagaand in Houtbaai doodgeskiet terwyl hulle Imizamo Yethu gepatrolleer het.

Nikani het op die toneel gesterf en Nduku het later in die hospitaal beswyk.

Mpumelelo Xakekile (50), ‘n metropolisiebeampte, is ‘n week gelede doodgeskiet toe hy ‘n boete aan ‘n taxibestuurder in Khayelitsha uitgeskryf het.

Sandisile Ncapayi (18) het in verband met dié moord in die hof verskyn en sal binnekort na die hof terugkeer.

Volg Nuus24 op Twitter  

- SAPA