Polisieman dood drie in bisarre Nuwejaars-skiettog
2011-01-01 15:12
Johannesburg – ‘n Polisiebeampte, wat nie op diens was nie, het glo drie mense doodgeskiet en twee gewond in ‘n bisarre Nuwejaars-skietvoorval, het die polisie in KwaZulu-Natal Saterdag gesê.
“Die verdagte het sy meisie, haar suster, haar broer en twee vermeende rowers geskiet,” het kol. Vincent Mdunge, polisiewoordvoerder, gesê.
Volgens Mdunge het die verdagte aan sy vriend gesê dat hy iemand gaan aanval.
“Die vriend het onveilig gevoel en gevra dat die verdagte hom in Mobeni aflaai. Die verdagte het daarna na sy meisie se huis in Umlazi gery.”
Na bewering het ‘n struweling uitgebreek tussen die verdagte, sy meisie en haar gesin. Kort daarna het die polisiebeampte op die slagoffers losgebrand.
Die broer en suster het op die toneel aan hulle beserings beswyk. Die verdagte se meisie is steeds in ‘n kritieke toestand in die hospitaal.
Na afloop van die voorval het die man terug in sy motor geklim en na sy vriend in Mobeni gery.
“Met die verdagte se aankoms in Mobeni was twee verdagtes glo besig om sy vriend te beroof. Hy het weer sy vuurwapen uitgehaal en op die twee vermeende rowers geskiet.
“Een van die mans het op die toneel gesterf en die ander is in die hand gewond. Die polisieman het weer in sy motor geklim en na Klaarwater gery waar hy homself in die kop geskiet het,” het Mdunge gesê.
Die polisieman is in ‘n kritieke toestand in die hospitaal.
Die motief agter die tragedie is nog nie bekend nie.
Volg Nuus24 op Twitter.
- SAPA